Deel 2

Die belang van die Slag van Bloedrivier vir die Prinsloo-nageslagte

Willem Petrus Prinsloo (Willem Spreeu), en sy oudste seun Willem Petrus Prinsloo (Willem Wragtag), was direk betrokke by die gelofte-aflegging en die daaropvolgende Slag van Bloedrivier. Dit is nie bekend of daar sytak-stambome van die Prinsloo-familie betrokke was nie, maar dit is wel moontlik. Dit is ook beslis moontlik dat voorouers van eggenote van die latere geslagte van Prinsloos betrokke was. Om hierdie rede vorm die Slag van Bloedrivier ‘n kerngedeelte van die Prinsloo familie se geskiedenis.

Met die Slag van Bloedrivier en die oorsakende gebeure en wat daarna gebeur het, kan dit baie duidelik afgelei word van watter stoffasie hierdie voorouers (verwysend na al die Voortrekkers) gemaak was. Hulle het geheel en al hulle lewe aan die Here vir die nodige leiding oorgelaat en streng volgens die beginsel van die vrugte van die Gees gelewe. Hulle is gemartel, beroof, vermoor, vermorsel — maar hulle het nie self in weerwraak gemartel, geroof, mense vermoor of vermorsel nie. Anders as die trekkers in die VSA waar inheemse inboorlinge voor die voet uitgeskiet is, het die Voortrekkers selfs probeer om grond by die inheemse volkere te koop. Dit sou byvoorbeeld makliker gewees het om die Zoeloenasie sonder enige waarskuwing te gaan verdelg.

Hierdie hoë Christelike waardes is en was nog altyd deel van die Afrikanervolk. Hulle ontwrikbare geloof in God het oorgeloop in die deursettingsvermoëns van hierdie pioniers, omdat hulle geglo het dat wat hulle ookal doen dit die wil van God moet wees om te kan slaag. Hierdie kinderlike afhanklikheid en geloof in die Here het gelei tot die aflê van die Gelofte aangesien dit wat voor hulle gelê het, as menslik onmoontlik deur hulle gesien is (en ook inderwaarheid was!)