Die-Prinsloos wat veral in Bronkhorstspruit-distrik vir geslagte woonagtig was, het met oorlewering beweer dat die Prinsloofamilie hulle erfgrond ‘deurgebring’ het. Dit was in een stadium, veral gedurende die eerste helfte van die twintigste eeu, ‘n skande as jy

‘n erfplaas sou verkoop.

Dit is verstaanbaar dat hulle so geredeneer het, aangesien ek nog as kind met ou mense van die vyftigerjare kontak gehad het, en hulle oor die algemeen nie die Prinsloofamilie kon verdra nie! Hulle was seker nie in staat om nog Plase by te koop nie. Jaloesie is egter die werklike verklaring van die afkraak van die Prinsloofamilie.

Wat in die praktyk egter gebeur het met betrekking tot Willem Wragtag se plaaserflatings, is dat elkeen van sy agt kinders Plase geerf het. Die mense van daardie tyd het groot gesinne gehad en elkeen van die kinders het Plase (of dele daarvan) geerf. Met elke verdere geslag is hierdie Plase verder onderverdeel tot op ‘n tydstip dat dit nie meer deelbaar was nie. ‘n Unieke voorbeeld hiervan is my oupa Louwrens Johannes Prinsloo se plaas Puntlyf wat verminder is tot 4 groot plotte!

Ongelukkig het die boerderybedryf na die Tweede Wêreldoorlog (veral saaiboerdery), baie vinnig van ‘n tipe bestaansboerdery weens ekonomiese druk moes omskakel na produksiegerigte boerderypraktyke wat streng volgens besigheidsnorme van vraag en aanbod bestuur moes word. Die meeste van die Prinsloo-nasate het hulle nou in ‘n verknorsing bevind aangesien die grootte van die Plase nie meer ekonomiese eenhede was nie. Hierdie delemma het die plaaseienaar onder druk geplaas.

‘n Ander uitvloeisel van bogenoemde is dat die jonger geslag nie meer in ‘n boerdery loopbaan belang gestel het nie aangesien ‘n ander loopbaan meer sou bied. Daarom het hulle hierdie plasies verkoop en eerder eiendom in ‘n stedelike gebied gekoop vanwaar hulle hul loopbane kan beoefen.

In die meeste gevalle is die Prinsloo-plase as versnipperde grond verkoop. Daarom is daar baie min van die gronde wat Willem Wragtag vir sy kinders nagelaat het nog in familiebesit.